ЗӨВЛӨГӨӨ | Цахим орчны далд эрсдлээс хэрхэн сэргийлэх вэ

Сошиал орчинд эерэг зүйл олон ч нөгөө талдаа эрсдэл, аюул дагуулсан орон зай болж байна.

Сошиал орчинд эерэг зүйл олон ч нөгөө талдаа эрсдэл, аюул дагуулсан орон зай болж байна. Өсвөр үеийнхэн, залуусын гэнэн итгэмтгий занг ашиглан уруу татах, заналхийлэх, хуурах, залилах тохиолдлууд нэмэгдэж байгаа нь бодит эрсдэл юм. Бид хэрсүү хандахгүй бол хаана ч, хэн ч энэ эрсдэлд өртөх боломжтой.

Иймээс хүүхдэд цахим орчны аюулгүй байдлын суурь ойлголтыг тогтмол өгч, танихгүй хүнд хувийн мэдээлэл өгөхгүй байх, сэжигтэй харилцаанаас зайлсхийх, асуудал гарвал итгэлтэй том хүнд хандах дадлыг хэвшүүлэх нь чухал.

Эцэг эх, асран хамгаалагчид хяналт тавихаас илүүтэй ойлголцол, итгэлцэл бий болгох хэрэгтэй. Хүүхэд айхгүйгээр ярьж чаддаг байх нь урьдчилан сэргийлэх хамгийн үр дүнтэй арга болдог.

Мэдээж хүүхдийнхээ орон зайг хүндэтгэх нь чухал. Гэхдээ тэдний цахим хэрэглээнд анхаарал тавьж, эрсдэлээс сэргийлэх мэдээллийг тогтмол өгч байх нь бидний хамтын хариуцлага юм.

Иймээс дараах зөвлөгөөг хүргэе:

1. Хүүхэдтэйгээ тогтмол ярилцаж, цахим орчинд юу үзэж, хэнтэй харилцаж байгааг нь нээлттэй асууж, шүүмжлэлгүй сонсох.
2. Хувийн мэдээллийн үнэ цэнийг ойлгуулж, нэр, хаяг, сургууль, утас зэрэг мэдээллийг танихгүй хүнд өгөхгүй байх дадал суулгах.
3. Сэжигтэй мессеж, линк, саналд хэрхэн хариу үйлдэл үзүүлэхийг урьдчилан зааж, бодит жишээгээр тайлбарлах.
4. Дижитал хэрэглээний тодорхой хязгаар, дүрмийг хамтдаа тохирч, хэрэгжүүлдэг байх.
5. Хүүхдэд итгэл төрүүлэх орчныг бүрдүүлж, ямар нэг асуудал гарвал айхгүйгээр хамгийн түрүүнд танд хандаж чаддаг болгох.