Тууштай байдал, үнэт зүйл бол хүүхэд хамгааллын салбарын амин сүнс
Хүүхдийн эрх ашиг үргэлж нэгт тавих ёстойг хүн бүхэн санах ёстой.
Лантуун ДОХИО ТББ-ын нэхэмжлэлтэй, Монгол Улсын Засгийн Газарт холбогдох захиргааны хэргийг давж заалдах шатны шүүх хэлэлцэж, анхан шатны шүүхийн шийдвэрийг хэвээр үлдээн шийдвэрлэлээ.
Нэхэмжлэлийн гол үндэслэл болох Цар тахлын нөхцөлд хүүхдийг оролцуулан хурдан морины уралдаан зохион байгуулахаар шийдвэрлэсэн нь Монгол Улсын Үндсэн Хуулийн 16.11, Хүүхдийн эрхийн конвенцийн 3.1, Хүүхдийн эрхийн тухай хуулийн 4.1.2, Хүүхэд хамгааллийн тухай хуулийн 4.1.1-ээр хүлээсэн үүргээ Монгол Улсын Засгийн газар зөрчиж хууль бус шийдвэр гарсан болохыг 2 шатны шүүхээр хэлэлцэж эцэслэн шийдвэрлэв.
Шүүхийн шийдвэрийн ач холбогдол нь:
1. Наадам зохион байгуулах шийдвэрээс улбаалан наадамд бэлдэх уяа сойлгын үед амь насаа алдсан 3 хүүхдийн ар гэр, бэртэж гэмтсэн 31 хүүхэд, уяа сойлгын үеэр ковид авсан хүүхдийн ар гэр нь хүүхдийн амь нас, эрүүл мэндэд учирсан хохирлоо Монгол Улсын Засгийн газраас нэхэмжлэх
2. Засгийн газарт Монгол Улсын Үндсэн хууль, нэгдэн орсон Олон Улсын ковенцоор хүлээсэн “хүүхдийн эрх, ашиг сонирхлыг нэн түрүүнд” хамгаалах үүргийг нь дахин санууллаа.
3. Цаашид тахал, гамшигийн үед хүүхдийн амь нас эрүүл мэндийг эрсдэлд оруулж баяр наадам, уралдаан тэмцээн, аливаа үйл ажиллагаа явуулахгүй байх хуульчласан үүрэгтэйг тогтоож өгөв.
Өнгөрсөн 6 сараас эхлэн нийтийн эрх ашиг тэр дундаа, хүүхдийн дээд ашиг сонирхлын төлөө тууштай ажилласан Onch Shiidel NGO болон өмгөөлөгч Bolortuya Ulziibat нартаа онцгойлон талархъя. Биднийг үргэлж дэмжиж зөвлөн ажилласан Khurelbaatar Baasanjargal өмгөөлөгч, Bolorsaikhan Badamsambuu активист, Bolortsetseg Burneebaatar судлаач нартаа маш их баярлалаа. Та бүхний туршлага дэмжлэгээр тус ажлын ард амжилттай гарлаа. Цаашлаад Онц шийдэл ТББ -тай хамтран дараагийн шатны нөлөөллийг үе шаттайгаар хийхээр төлөвлөв. Тууштай байдал, үнэт зүйл бол хүүхэд хамгааллын салбарын амин сүнс билээ.
Хүүхдийн эрх ашиг үргэлж нэгт тавих ёстойг хүн бүхэн санах ёстой.
ЛАНТУУН ДОХИО ТББ