: ТАНИЛЦ | “Лантуун дохио” нэхэмжлэлтэй, МУ-ын ЗГ-т холбогдох захиргааны хэргийн шүүхийн шийдвэр

Дэд: “Лантуун дохио” нэхэмжлэлтэй, Монгол Улсын Засгийн Газарт холбогдох захиргааны хэргийн шүүхийн шийдвэрийг орууллаа.

Нэхэмжлэл нийтийн/хүүхдийн/ эрхийг төлөөлөн хамгаалах учраас жинхэнэ нэхэмжлэгч нартаа танилцуулж байна. Нэхэмжлэлийн гол үндэслэл болох Цар тахлын нөхцөлд хүүхдийг оролцуулан хурдан морины уралдаан зохион байгуулахаар шийдвэрлэсэн нь Монгол Улсын Үндсэн Хуулийн 16.11, Хүүхдийн эрхийн конвенцийн 3.1, Хүүхдийн эрхийн тухай хуулийн 4.1.2, Хүүхэд хамгааллийн тухай хуулийн 4.1.1-ээр хүлээсэн үүргээ Монгол Улсын Засгийн газар зөрчиж хууль бус шийдвэр гарсан болохыг тогтоож шийдвэрлэлээ. Шүүхийн шийдвэрийн ач холбогдол нь 1. Наадам зохион байгуулах шийдвэрээс улбаалан наадамд бэлдэх уяа сойлгын үед амь насаа алдсан гурван хүүхдийн ар гэр, бэртэж гэмтсэн 31 хүүхэд, уяа сойлгын үеэр ковид авсан хүүхдийн ар гэр нь хүүхдийн амь нас, эрүүл мэндэд учирсан хохирлоо Монгол Улсын Засгийн газраас нэхэмжлэх 2. Засгийн газарт Монгол Улсын Үндсэн хууль, нэгдэн орсон Олон Улсын ковенцоор хүлээсэн “хүүхдийн эрх, ашиг сонирхлыг нэн түрүүнд” хамгаалах үүргийг нь дахин санууллаа. 3. Цаашид тахал, гамшигийн үед хүүхдийн амь нас эрүүл мэндийг эрсдэлд оруулж баяр наадам, уралдаан тэмцээн, аливаа үйл ажиллагаа явуулахгүй байх хуульчласан үүрэгтэйг тогтоож өглөө Бид цаашид илүү бодлогын түвшинд нөлөөлөх ажлуудад оролцож, Баяр наадмын тухай хууль болон шинээр гарч буй эрх зүйн баримт бичгүүдэд Хүүхдийн эрхийг хамгаалсан зүйл заалтыг оруулахаар холбогдох ажлын хэсгүүдэд оролцож идэвхтэй байр сууриа илэрхийлж чадахаараа нөлөөлж ажиллана. Хүүхдийн дээд ашиг үргэлж нэгт тавих ёстойг хүн бүхэн санах ёстой. (2021.12.08)