ЛАНТУУН ДОХИО | Унаач хүүхдийн эрхийн хэрэгжилтийн бүхий л талаар хяналт тавьж ажиллах болно
Наадам зохион байгуулах шийдвэрийн улмаас наадамд бэлтгэх хурдан морины уяа сойлго, үсэргээ, уралдааны үед нийт 31 унаач хүүхэд бэртэж, 3 унаач хүүхэд амь насаараа хохирсон.
“Лантуун дохио” ТББ тэргүүтэй MONFEMNET National Network Монгол Улсын Засгийн газарт холбогдуулан “Засгийн газрын 2021 оны зургаадугаар сарын 23-ны өдрийн 171 дүгээр тогтоолын 2 дахь заалтын “хурдан морины уралдаан” гэх хэсэг, 3 дахь заалтыг бүхэлд нь хүчингүй болгуулах” шаардлага бүхий нэхэмжлэлийг 2021 оны зургаадугаар сарын 29-ний өдөр гаргаж байсан болно. Засгийн газраас 2021 оны долоодугаар сарын 02-ны өдрийн 183 дугаар тогтоолоор 171 дүгээр тогтоолыг хүчингүй болгож нэхэмжлэлийн зорилго хангагдсан ч наадам зохион байгуулах шийдвэрийн улмаас наадамд бэлтгэх хурдан морины уяа сойлго, үсэргээ, уралдааны үед нийт 31 унаач хүүхэд бэртэж, 3 унаач хүүхэд амь насаараа хохирсон харамсалтай баримт хэрэг хянан шийдвэрлэх ажиллагааны явцад цугларсан. Иймд хүүхдийн хөндөгдсөн эрх, хууль ёсны ашиг сонирхол сэргээгдээгүй учирсан хохирол нөхөн төлөгдөөгүй байсаар байх тул нэхэмжлэлийн шаардлагыг “Монгол Улсын Засгийн газрын 2021 оны зургаадугаар сарын 23-ны өдрийн 171 дугаар тогтоолын 2 дахь хэсгийн “хурдан морины уралдаан” хэсэг болон тус тогтоолын 3 дахь хэсгийг хууль бус байсан болохыг тогтоолгох” болгон өөрчилсөн юм. Тус нэхэмжлэл хангагдвал наадмын бэлтгэлээс болж амь нас, эрүүл мэндээрээ хохирсон хүүхдүүдийн эцэг, эх хохирлоо хууль бус шийдвэр гаргасан байгууллага болох Засгийн газраас нэхэмжлэх эрх үүснэ. Түүнчлэн Засгийн газар Монгол Улсын Үндсэн хуулийн 16.11-д заасан “гэр бүл, эх нялхас, хүүхдийн эрх ашгийг тар хамгаална” гэж заасан үүргээ зөрчсөн болохыг тогтоолгож цаашид “нэн тэргүүнд хүүхэд” гэх зарчмыг бүхий л үйл ажиллагаанд нь баримтлахыг шаардах хууль зүйн үндэслэл бүрдэнэ.
Мөн цар тахлын үеийн хуулиа төр өөрсдөө санаатайгаар зөрчсөн гэх мэт асар их доголдлуудыг засах, хариуцлага тооцох суурь болно гэдэгт итгэж байна. Нийслэл дэх Захиргааны хэргийн анхан шатны шүүхэд хэрэг хянан шийдвэрлэх ажиллагаа үргэлжилж байгаа бөгөөд өмнөх 6 удаагийн шүүх хурал нотлох баримт гаргуулах хүсэлтийг хангах, гуравдагч этгээдийн нотлох баримттай танилцах хүсэлтийг хангах, шүүгч солигдсонтой холбоотойгоор нэхэмжлэгч тал шүүгчээс татгалзсан, гуравдагчийн өмгөөлөгчийн эрүүл мэндийн шалтгаан гэх мэт шалтгаануудаар хойшилсон. 2021оны нэгдүгээр сарын 06-ны өдрийн шүүх хурал болох байсан ч гуравдагч талын өмгөөлөгч эрүүл мэндийн шалтгаанаар шүүх хуралдаан хойшлуулах хүсэлтийг хангаж шүүх хурлыг аравдугаар сарын 18-ны өдрийн 14 цагт товлолоо. Хүний эрхийн чиглэлээр тэр дундаа стратегийн өмгөөлөл, бодлогын нөлөөлөл бол асар их цаг хугацаа зарцуулдаг, тууштай байдлыг шаарддаг нэг талаараа үнэт зүйлдээ үнэнч байж тэвчээртэйгээр, сэтгэлтэйгээр ард нь гарахыг шаарддаг ажил билээ. Засгийн газар наадам хийхгүй гэсэн шийдвэрийг гаргасан ч энэ шийдвэрийг Улсын онцгой комисс зөрчин аймгуудад бүсийн уралдаан, овоо тахилга хийсэн. Хамгийн харамсалтай нь ЗГ-ын гаргасан шийдвэрийг төрийн тэргүүнээс эхлүүлээд Аймгийн онцгой комисс, Аймгийн засаг дарга нар уландаа гишгэсэн. Наадам хийхгүйгээ амлаж байсан гурван аймаг нууц далд хэлбэрээр бүсийн уралдаан зохион байгуулсан. “Лантуун дохио” ТББ-аас уг асуудалд албан бичиг шаардлага илгээсэн боловч арга хэмжээ аваагүй.
“Лантуун дохио” ТББ-аас цар тахлын үеийн хүүхдийн аюулгүй байдлын төлөө бид чадах бүхнээ хийх болно. Цаашид хүүхэд эндэхгүй байх, унаач хүүхдийн эрхийн хэрэгжилтэнд бүхий л талаар хяналт тавьж ажиллах болно. (2021.10.06)