“Лантуун дохио” ТББ: САНХҮҮГИЙН САХИЛГА БАТ үргэлж нэгт.

“Санхүүгийн сахилга бат үргэлж нэгт” гэдэг зарчим бол “Лантуун дохио” ТББ-ын баримталдаг чухал зарчим. Энэ зарчмын үндэс нь үйл ажиллагаа нээллттэй ил тод байдал, санхүүгийн сахилга бат буюу санхүүгийн ил тод байдал.

Тэр ч утгаараа жил болгон сайн дураараа аудитын шалгалтанд ордог. Олон нийт зарим хардлагад үндэслэн санхүүгийн тайлангаа үнэн зөвөөр сайн дураараа хамгийн шалгуур өндөртэй аудитын компаниар шалгуулдаг. Манай байгууллагын нягтлан н.Бямбасүрэн сүүлийн таван жилийн аудитын шалгалтыг давсан туршлагатай. Хандив гэдэг нэг талаараа соёл. Нэг талаараа хөрөнгө оруулалт. Бид тэдгээр хандивын урсгалыг зөв менежмент хийж, чиглүүлдэг. Харин хандив бол цаад утгаараа хөрөнгө оруулалт.

Хүүхэд хамгаалал, хөгжлийн салбарт оруулж буй хөрөнгө оруулалт. Тиймээс хэсэг хүмүүсийг цалинжуулаад, санхүүжүүлээд яваа гэж ойлгох нь өрөөсгөл. 

Хүн байж гэмээнэ байшин амин сүнстэй. Хүн байж гэмээнэ цэцэрлэг, хамгаалах байрны үйлчилгээ сайжирна. Хүн л энэ бүхний хөшүүрэг. Үйл ажиллагаа тууштай явах хамгийн том мотор бол боловсон хүчин. Түүнд зарцуулж байгаа бүхэн эргээд сайжруулах, хангалттай хэмжээний хөрөнгө босгох, цаашлаад тогтвортой үйл ажиллагаа, биеэ даасан санхүүжилттай болох суурь гэдгийг маш сайн ойлгох хэрэгцээ бидэнд байна. Энэ бүхнээс хүүхдэд жинхэнэ үр дүн, үр шим очно. 

Хүний төлөө тууштай ажиллаж байгаа баг хамт олон, тууштай дэмждэг бүхий л хандивлагч, дэмжигч нартаа баярлалаа. Тууштай дэмжлэг бол тууштай хөрөнгө оруулалт юм. Магадгүй таны оруулсан хөрөнгө оруулалтын үр дүн 5 цаашлаад 20 жилийн дараа ч гарахыг үгүйсгэхгүй. Гэхдээ ард нь гараад би зөв зүйл хийжээ гээд дотроо өөртөө баяр хүргэх тэр сайхан цагийг бүтээх хүртэл хамтдаа зүтгэе. Хамт байгаарай гэж хүсье. (2022.01.06)