ЭЦЭГ ЭХЧҮҮДЭД: Нийгмийн сүлжээг аюулгүй хэрэглэх зөвлөмж

6 сар-н өмнө 406

advise image

Өсвөр насны хүүхдийг хүмүүжүүлнэ гэдэг амаргүй зүйл. Нэг талаас өсөж том болж байгаа хүүхдээ зөнд нь орхиж, алдаанаасаа суралцах боломж олгомоор байдаг. Гэтэл нөгөө талаас бүх зүйлийг нь хийж өгөөд, хамгаалаад баймааргүй байдаг.

Цахим аюулгүй байдлын тухай ярихад нийгмийн сүлжээ гэдэг зүйл дангаараа асар олон асуудлын үндэс болдог гэмтэй. Зүгээр нэг аймшгийн өгүүллэгээс эхлээд энд юу ч байж болно. Тиймээс л эцэг, эхчүүд хүүхдийнхээ нийгмийн сүлжээний хэрэглээнд оролцох шаардлагатай.

Шударгаар хэлэхэд ихэнх эцэг, эхчүүд өөрсдөө Твиттер болон Facebook ашигладаг. Гэхдээ энэ нь бүх эцэг, эх нийгмийн сүлжээний идэвхтэй хэрэглэгчид гэсэн үг биш юм. Тиймээс хэрвээ таны өсвөр насны хүүхэд нийгмийн сүлжээ ашигладаг бол... та ч гэсэн идэвхтэй, сайн талаар нь ашиглаж сурах хэрэгтэй гэсэн үг.

Идэвхтэй ашиглахгүй байлаа ч гэсэн та хүүхэдтэйгээ нийгмийн сүлжээнд найз болохыг хичээх хэрэгтэй. Ингэснээр хүүхдийнхээ юу бичиж, нийтэлж, юу сонирхож байгааг харахад хялбар байх болно. Түүнчлэн хүүхдүүд өөрт тулгарсан асуудлаа нийгмийн сүлжээндээ бусадтай хуваалцах нь түгээмэл байдаг. Гэхдээ Facebook-ийн хэрэглэгчид ямар мэдээллийг, хэнд харуулах вэ, гэдгийг сонгох сонголттой байдаг болохоор зарим зүйлсийг нь та магадгүй хэзээ ч харахгүй байх.

Дахиад нэг зүйлийг сануулахад ихэнх өсвөр насныхан дан ганц Facebook, Твиттерээс гадна өөр олон төрлийн нийгмийн сүлжээ ашигладаг. Тиймээс эцэг эхчүүд хүүхдийнхээ ашигладаг нийгмийн сүлжээг аль болох мэддэг байх хэрэгтэй. Зарим нэгэн жишээ дурдахад: Facebook Твиттер G+ Instagram Tumblr Snapchat Meetme Vk

НЭЭЛТТЭЙ ХАРИЛЦАА

Юун түрүүнд хүүхэдтэйгээ нээлттэй харилцаж байж, хүүхэд эргээд эцэг эхтэйгээ нээлттэй харилцдаг. Хүүхэд өөрт тулгарсан асуудал, бэрхшээлээ эцэг эхдээ төвөггүй хэлдэг байх нь чухал. Хэрвээ ямар нэгэн шийтгэл хүртэнэ гэж итгэсэн бол ихэнх юмаа ярихгүй өнгөрөх нь бий. Түүнчлэн өсвөр насныхан таны хэлсэн таны битгий гэсэн зүйлсийг хийж, ярих сонирхолтой байдаг. Угаас хүний мөн чанар нь тийм.

Тэгэхээр хүүхдийнхээ юу сонирхож, юу хийж байгааг хүндлэх, буруу бол яагаад буруу гэдгийг нь эвтэйхэн ойлгуулах нь чухал. Хамгийн гол нь өөрөө үлгэр жишээ байх хэрэгтэй. Ямар нэгэн Facebook группт та өөрөө байдаг, идэвхтэй ашигладаг мөртлөө хүүхдээ ашиглаж болохгүй гэх нь утгагүй юм.

ТОДОРХОЙ ХЯЗГААР ТОГТООЖ, УЧРЫГ ТАЙЛБАРЛАХ

Нэг сонирхолтой зүйлийг сануулахад Facebook-ийн 13 наснаас доош насныхан ашиглах эрхгүй. Учир нь шинээр хаяг нээхэд Facebook 13 хүрсэн эсэхийг шалгадаг.Гэвч компани үүнийгээ нэг их хүчилдэггүй учраас хэрэглэгч хүссэнээрээ насаа худал хэлж болно. Манай 12 настай дүү гэхэд өөрийгөө 18-тай гээд хаяг нээчихсэн байх жишээтэй.Тиймээс та эхлээд хүүхдээ 13 нас хүртэл нь хаяг нээж болохгүй гэдгийг ойлгуулж, ашиглаж эхэлсний дараа ямар группт элсэж болох, хэнтэй найз болж, хэнтэй харилцаж болохгүй вэ, гэдгийг нь ойлгуулах ёстой.Хэрэв таны хүүхэд аль хэдийнэ нийгмийн сүлжээг идэвхтэй ашигладаг болчихсон, төрөл бүрийн группт сонирхлоороо элсчихсэн бол загнаж, зандрах хэрэггүй. Харин учрыг нь сайн ойлгуулж, хамт сууж байгаад болохгүй зүйлсийг нь залруулаарай.

Facebook дээр ямар зураг оруулж болох, ямар зураг оруулж болохгүй, бичиж байгаа зүйлээ зөвхөн найзууддаа, эсвэл ганц, хоёрхон хүнд харагдуулдаг болох сонголт байдаг гэдгийг нь хэлж өгөх хэрэгтэй. Үгүй бол бүх зүйлээ олон нийтэд нээлттэй бичээд байдаг гэмтэй. Ингээд тодорхой хязгаар тогтоож, хяналт тавихын зэрэгцээ та хүүхдийнхээ хувийн нууцыг хүндэтгэх шаардлагатай.Зөвхөн өөртөө зориулсан зүйлс ч таны хүүхдэд бий. Тиймээс өөртөө зориулсан орон зайг нь битгий үгүй хийгээрэй. Төд удалгүй таны хүүхэд нийгмийн сүлжээг хэнээс ч дутуугүй ашигладаг болохын цагт та зарим зүйлсийг нь хэзээ ч олж мэдэж чадахгүй болно.

Хүүхдүүд гэлтгүй эцэг, эхчүүд ч гэсэн нийгмийн сүлжээнд алдаа гаргадаг гэдгийг та мэдэх үү? Амралтаар явж байх үедээ “Энд явж байна, тэнд явж байна” гэсэн гарчигтай зургуудаа оруулах шаардлагагүй. Эргэж ирснийхээ дараа оруулах хэрэгтэй.

Эх сурвалж: news.gogo.mn

Лантуун дохио ТББ