Ид шидийн орны барилгын нээлт ирэх сарын нэгэнд болно

1 сар, 1 долоо хоног-н өмнө 4049

advise image

Ид шидийн орон төсөл маань мөш амжилттай явагдаж байгаа бөгөөд энэ оны хамгийн гэрэл гэгээтэй, олон хүний зүрх сэтгэл, хүч хөдөлмөр шингэсэн бүтээн байгуулалт билээ. Өнгөрсөн 4 сард дөнгөж газар шорооны ажлаа эхлүүлж байсан бол одоо хоёр хос барилгыг сүндэрлүүлж хүүхдийн сагсны талбай болон, хүүхдийн тоглоомын талбайн ажлуудыг хийж, ажилчдын гэр камп баригдаж дуусч байна. Мөн тог, цахилгаан, сангийн ажлууд маш амжилттай хийгдсэн.

Өнөөдрийн байдлаар Ид шидийн орон хүүхэд хамгаалал хөгжлийн төв дотор засал 80%-тай явж байна. Одоогоор бидний гол үйл ажиллагааа явагдах өрөөнүүд болох Номын сан, Өдөр өнжүүлэх анги буюу хүүхэд харах үйлчилгээний 2 анги, Гал тогоо, Сэтгэлзүйчийн өрөө, Сургалтын танхим зэрэг өрөөнүүдэд дотоод тохижилтын ажил эхлэхэд бэлэн болоод байгаа юм.

Бид тохижилтын ажлуудаа энэ сардаа багтаагаад барилгын нээлтээ 2017 оны 09-р сарын 01-ны өдөр хийхээр төлөвлөж байна. Хүүхэд хамгаалал хөгжлийн төвийн үйл ажиллагааны нээлт 10-р сарын дундуур хийгдэнэ. Боловсон хүчин болон, бусад бэлтгэл ажлуудаа 100 хувь хангасаны дараагаас тогтмол үйл ажиллагаа явагдах болно. Барилгын нээлттэй хамт бичиг цаас, зохион байгуулалт, гадаад харилцааны гээд бүхий л салбарын үйл ажиллагаанууд зэрэг зэрэг явагдаж байна.

Дээр дурьдсан анги танхимуудын дотоод засалд зөвлөгөө болон хувь нэмрээ оруулах хүсэлтэй дизайнер залуучууд, хувь хүн, байгууллагуудтай хамтарч ажиллахад бид бэлэн байна. Бидэнтэй хамтарч ажиллах бол 91112221 дугаараар холбогдоно уу?

Ид шидийг хамтдаа бүтээцгээе. Ирэх 9-р сарын 1-ний өдөр та бүхэнтэйгээ инээд хөөрөөр дүүрэн уулзацгаах болно.

Лантуун дохио ТББ