“ИД ШИДИЙН ОРОН 2” ТӨСӨЛД ЭНЕРЖИ РЕСУРС 740 САЯ ТӨГРӨГ ХАНДИВЛАЛАА

3 долоо хоног, 6 өдөр-н өмнө 2330

advise image

Хүүхэд хамгааллын чиглэлээр бидний нэгдэн хэрэгжүүлж чадсан хамгийн амжилттай төсөл болох “Ид шидийн орон” цогц төвийн 2 дахь шатны төслийг Лантуун Дохио ТББ эхлүүлж байна. Шинэ төслийг Монгол Улсын ТОП 5 компанийн нэг Энержи Ресурс дэмжиж нийт шаардлагатай санхүүжилтийн тэн хагасыг буюу 740 сая төгрөгийг хандивлалаа.

“Ид шидийн орон” төсөл анх санаачлагдахдаа Улаанбаатар хотын хэмжээгээр хамгийн том, амьжиргааны түвшин доогуур 2 дүүрэгт эхлэж баригдахаар төлөвлөгдсөн бөгөөд энэ нь Сонгино хайрхан ба Баянзүрх дүүрэг билээ. Өнөөдөр Монгол Улсад хүүхэд хамгаалал, хөгжлийн чиглэлд хамгийн хэрэгцээтэй байгаа зүйл бол бодитой барилга байгууламж бүтээн байгуулалт, хүүхэд руу чиглэсэн мэргэжлийн үйлчилгээ юм. Яг энэ чухал цаг үед Энержи Ресурс компани 10 жилийнхээ ойн хүрээнд нийгэм руу чиглэсэн бодитой үйл ажиллагаа явуулж буй, хараат бус ТББ-уудыг дэмжих хөтөлбөр явуулж, 740 сая төгрөгний тусламж олгосныг бид шинэ төв байгуулагдах газар дээрээ гардаж авлаа. Үндэсний компанийн зүгээс ийнхүү бодитой санхүүгийн тусламжийг үзүүлж байгаа нь жинхэнэ утгаараа байгууллагын нийгмийн хариуцлага, нүдээ олсон том шийдвэр, түүхэн үйл явдал болж чадлаа.

“Ид шидийн орон 2” төв нь Улаанбаатар хотын зүүн зах буюу Улиастайн эцэст, 4,200 мкв талбайд хүүхэд хамгаалал хөгжлийн төв, спорт комплекс, тоглоомын талбай, ногоон байгууламж, цэцэрлэгт хүрээлэн, гараш болон түр байрлах байрнаас бүрдсэн цогц төв болох бөгөөд одоогийн Баянхошуунд баригдсан “Ид шидийн орон” төвөөс даруй 2 дахин том хэмжээтэй бүтээн байгуулалт болох юм. Тус төвийн барилга бүтээцийн ажил 2019 оны 04 сараас эхлэх бөгөөд тэр хүртэл хугацаанд зураг төсөл, ажлын зураг, дэд бүтэц болон бусад бэлтгэл ажлууд хийгдэх юм.

2017 оны зун ердөө 150 хоногийн дотор бүх дэлхийн Монголчууд нэгдэн хүүхдийн төлөө “Ид шидийн орон” хүүхэд хамгаалал хөгжлийн цогц төвийг бүтээж чадсан билээ. Тус төв нь өнөөдрийг хүртэл Сонгино хайрхан дүүргийн Баянхошуунд төр засгийн санхүүжилт, тусламжгүйгээр бүтэн жилийн хугацаанд амжилттай үйл ажиллагаа явуулан хүчирхийлэлд өртсөн 52 кейс хэргийг шийдвэрлэн, цэцэрлэгийн 2 бүлгийн 70 хүүхдийг үнэ төлбөргүй хамруулж, олон зуун хүүхдийг номын сан, сургалт боловсролоор хангаж байна. Гэсэн хэдий ч бидний өдөр бүр харж буй хүүхдийн эрхийг зөрчсөн аймшигтай мэдээнүүд, түүний ард мэдээлэгдэхгүй үлдэж байгаа хэдэн мянган хэргийг харахад бидэнд нэг биш хэдэн арван “Ид шидийн орон” хэрэгтэй нь харагдаж байна.

Монгол Улсын ирээдүй хойч болсон хүүхдийн төлөө нэг удаа биш нэг насанд нь үлдэх оюуны болоод шууд хөрөнгө оруулалт хийж буй Энержи Ресурс компанийн нийт хамт олон болон удирдлагын багт чин сэтгэлээсээ талархал илэрхийлье !

Лантуун дохио ТББ

Улаанбаатар хот 2018.11.14