Эцэг эх байх нь баяр хөөрөөр дүүрэн боловч заримдаа уур уцаар хүрмээр, аз жаргалаар бялхмаар хэдий ч үе үехэн ямар их ядарч сульдсанаа мэдэрдэг адал явдал дүүрэн аялал мэт. Тэрхүү аяллын зорилго нь нэгэн бяцхан хүү, эсвэл охиныг хайр халамжаар дутаалгүй, аз жаргал, инээд хөөр бялхуулж нялх балчир наснаас биеэ даасан том хүн болтол нь гараас нь хөтлөж амьдралд хөл нийлүүлэн алхахад хэрэгтэй бүхэнд нь сургах шүү дээ. Заримдаа энэхүү зорилго нь үнэхээр хүршгүй, биелэшгүй мэт санагдах хүнд хэцүү үе эцэг, эхчүүдэд байдаг байх. Зарим үед аав, ээжүүд яахаа ч мэдэхгүй болдог байх. Бүүр аль нь зөв болохыг ойлгохоо болих үе ч тааралддаг. Аав ээжүүдийн зовлонг би маш сайн ойлгож байна. Тэд амьдралд тохиолддог олон олон дарамт шахалт, хүндрэлтэй асуудлуудад дарагдан дээрх гол зорилгоосоо ухарч няцах нь ч бий. Аав ээжүүдийн олонх нь хүүхдээ хэрхэн хүмүүжүүлэх талаар амьдралаас сурдаг. Тэд хүүхдийн нас, биеийн хөгжлийн онцлог, сэтгэл санаа хэрхэн өөр өөр болж хувирдаг талаар мэдээлэлгүй тул ихэвчлэн зөн совингоороо л хүүхдээ хүмүүжүүлдэг. Тэд өөрийн хүүхэд насанд тохиолдож байсан үйл явдал дээр тулгуурласан туршлага дээрээ үндэслэн хүүхдүүдээ хүмүүжүүлдэг. Магад ихэнх аав ээжүүдийн хүүхэд насны туршлага нь сөрөг талдаа, тэр ч бүү хэл хүчирхийлэлд өртсөн тухай дурсамжууд байдаг. Ийм учраас хүүхдээ хүмүүжүүлэхдээ намайг бага байхад гэсэн хуучинсаг хандлагаар хандаж хүүхдээ зодох, гар хүрэх, суран тэлээ, таван салаа боов, алганы амт зэрэг хэлцүүдээр хүүхдүүдээ хүмүүжүүлж төлөвшүүлж ирсэн. Магад зарим ээж аавууд харамсдаг бол зарим нь ийм зүйл байх ёстой гэж итгэсэн байдаг. Гэхдээ Аав, ээжүүд ээ! Та бүхэн өөр арга замаар хүүхдээ хүмүүжүүлж болно шүү. Та бүхэнд маш энгийн арга санал болгож байна. Энэ бол хүүхэдтэйгээ ярилцах замаар зааж сургах. Хүүхэдтэйгээ найзла. Ярилц. Ойлгуул, мэдрүүл. Бас хайртай гэдгээ үргэлж мэдрүүлэх хэрэгтэй. Алдаа хийж байвал хамтдаа засч залруул. Уурлахаасаа өмнө хүүхдээсээ асуу! Яагаад ийм зүйл хийв. Чиний зөв үү? Буруу юу? Эрхлүүлэх биш нөхөрлөх хэрэгтэй. Тэгж байж та хүүхдийн ертөнцийг ойлгох болно. Миний танд санал болгож энэ арга маш энгийн мөртлөө маш их тэвчээр шаардана гэдгийг мэдэж байна. Гэхдээ та оролдоод туршаад үзээрэй. Лантуу хүүгийн найзууд үргэлж туршиж үздэг, бас тэвчээртэй байдаг. Эрхэм аав, ээжүүд ээ та бүхэндээ итгэж байна шүү. Хүүхдээ битгий хүчирхийллийн аргаар хүмүүжүүлээрэй. Хүчирхийлэл хүчирхийллийг төрүүлдэг юм шүү. 2017.04.25 Лантуу хүүгээс