**_Тэд юугаар ч битгий өлсөж цангаасай!_** Унтаж байгаа ээж … 2 хүүхдийн гутал … Ханын материалын эцэс … 2020 он … 04-р сар …. Хөл хорио, цар тахал … 46000 хүн ажлаас халагдсан. Зээлээс зээл, түрээснээс түрээс, цалингаас цалингийн хооронд амьдарч байсан хүмүүст хадгаламж бараг байгаагүй. Нэг сар тэссэн, хоёр сар гүрийсэн одоо бол үнэхээр модоо барьж байна. Ухамсар муут зарим нь тэмцэж тэсэхийн оронд архи ууж, хамгийн хүч муутай хүүхэд руу уураа гаргаж, үүнийх нь үр дүнд зөвхөн манай хүчирхийллийн хамгаалах байр гэхэд даруй 4 дахин олон хүүхэдтэй болсон, улс даяар ийм байгаа. Төр засаг маань ч сонгуулийн өмнөх энэ үеэр зарим бодит мэдээллийг нуух шинжтэй болоод эхэллээ. **Лантуу хүүгийн богц аян** Энэ аян бол маш энгийн юм. Дор бүрнээ чадах чинээгээрээ алслагдсан гэр хорооллын хүнд нөхцөлтэй байгаа өрх, хүүхдүүдэд хүнс дөхүүлцгээе. Өөрсдөд чинь туршлага боломж байгаа бол заавал "Ид шидийн орон"-оор дамжуулахгүй байсан ч болно. Гол уриалга нь, зүгээр хараад суух биш ямар нэг зүйл хийцгээе, өнөө шөнө хэдэн мянган хүүхэд хоосон ходоодтой айдастай хонохыг таашгүй. Хэрвээ бидний зохион байгуулж байгаа "Лантуу хүүгийн богц" аянаар дамжуулж хүүхдүүдэд хүргэе гэвэл ГУРИЛ БУДАА БООРЦОГ ДАВС ТОС гэх мэт муудахгүй, өмхийрөхгүй, хүүхэд хордлого өгчихгүй хүнсийг “Чадах хэмжээгээрээ” Улиастайн эцэст байрлах "Ид шидийн орон 2" төв дээр 05 сарын 04 - 05 сарын 08 өдрүүдэд 10-19 цагийн хооронд аваачиж өгнө үү. Бид хагас бүтэн сайн өдөр сайн дурын багууд гаргаж өөрсдийн туршлага мэдээлэл дээр тулгуурлан хамгийн хүнд нөхцөлтэй, хэрэгцээтэй өрх, хүүхдүүдэд хүргэж өгөх болно. Хандив тусламжинд их бага гэж байдаггүй зөвхөн чин сэтгэлийн гараа сунгахад л болно. Тооцоолж үзэхэд нэг хүн 20.000 төгрөгөнд хөөрхөн хэдэн хил гурил будаа авчих юм билээ. Улс төрийн сонгууль болох гэж байгаа төвөгтэй үед ийм олныг хамарсан, үнэгүй юм тараадаг аян хийх гэж байна. Манайд /намайг оруулаад/ ямар ч сонгуульд нэр дэвшигч, горилогч байхгүй бөгөөд аль ч нам эвслийн харьяалал байхгүй болно. Ирж болох эрсдэлийг мэдэж байгаа. "Бэлэнчлэх сэтгэлгээг өөхшүүллээ, загас барих аргыг нь зааж өгөх ёстой, төрийн ажлыг урдуур нь орж хийлээ …" юу ч гэж болно, тэрийгээ ч мэдэж байгаа. Гэтэл яг өнөөдөр хүүхдүүд нь идэх хоолгүй, өлсгөлөнд нэрвэгдэх эрсдэлтэй энэ үед төр засаг нь ямаанд тэтгэмж баталж, хүүхэд хамгааллын зардлыг “Тэвчиж болох зардал” гээд хассан. Ямар ч хүлээлт алга, зүгээр л … “Зүгээр суумааргүй байна”. Хүнс тараалаа гээд асуудал шийдэгдчихгүйг мэдэхээс цаагуур мэдэж байна. Гэтэл яг захын гэр хорооллоор хагас сар алхаад нүдээрээ тэр өлсгөлөн, тэр өрөвдөлтэй нүднүүдийг харчихсаны дараа “Нэг ч гэсэн хүүхэд, хэдэн өдөр ч болов” гэсэн бодол л төрдөг юм билээ. Нээх том том юм ярихаа болиод зүгээр л дор бүрнээ чадах чадахаараа л хөдөлцгөөе ! Хамаагүй өөрийнхөө хүүхдийн тоогоор л нэг нэг бөндгөр тортой хүнс бэлдээд аваачаад өгчих, тэдний хамтдаа өсөх нийгэм шүү дээ. Энэ нь үндсэндээ бид өөрсдөө арай дээр ХҮН байх гэсэн оролдлого юм. Ийм хүнд хэцүү цаг үед "ХҮН" хэвээрээ байгаа гэдгээ мэдрэх гэсэн мэрийлт юм. Тэнд хүүхдүүд хүчирхийлэлд өртөж, хоолгүй бүлтгэнээд сууж байхад нүдээ аниад өнгөрчихөөгүй бүтэн нойртой хонох гэсэн хувиа хичээлт юм. Үнэхээр онцгой шалтгаан үгүй бол ирээд ав, ингэ тэг гэсэн шаардлага битгий үүсгээрэй, аваачаад хүргээд өгөөрэй, ийм тийм пост оруул ингэж тэгэж маркетинг хий гэж битгий тулгаарай. Үүнийг түгээж байгаа "Лантуун дохио"-н залуус ч гэсэн эрүүл мэнд бүх зүйлээ эрсдэлд оруулаад цар тахалын үеэр хэдэн арав, зуун км газрыг гурил будаа үүрч жалга гуу уулын орой дээр байгаа айлд гэрэл, итгэл тээж очих амаргүй ажил хийх юм. Нэг бондгор тор нь нэг хүүхдийн инээмсэглэл бас гэрэл юм. Өдөр бүр чадахгүй ч гэдэс цадсан өдрийг тэр хүүхэд лав хэзээ ч мартахгүй байх, саар энэ нийгэмд сайн хүмүүс байдаг юм гэдэгт итгэдэг болох байх. Хаяг: "Ид шидийн орон 2 төв" - Гачуурт руу явах замд хойшоо Улиастай руу салаад автобусны буудлаа дуустал нь яваад “Ид шидийн орон 300 метр” гэсэн самбарыг дагаад хүрнэ. **Хүнсний хандив хүлээж авах хугацаа:** 2020.05.04 - 05.08 хооронд 10-19 цагийн хооронд **Хол байгаа хүмүүст данс - Хаан банк:** 5011455609, Хүлээн авагч: ЛАНТУУН ДОХИО ТББ – Гүйлгээний утга дээр заавал "Лантуу хүүгийн богц аянд" гэж бичээрэй. **Холбогдох дугаар:** 7707-6996, 9422-2888, 8808-4470 **Хандиваа шалгах шилэн данс** - http://lantuu.mn/lantuuhuu/donate/ цаг минутаараа гарна.