13 настай охиныг "Очир" төвд хөнөөсөн Д.Жавхлан, М.Амарболд нарт бүх насаар нь хорих ял оноолоо

2 долоо хоног, 4 өдөр-н өмнө 1249

advise image

2017 оны наймдугаар сарын 23-ны өдөр Баянзүрх дүүргийн 21 дүгээр хорооны нутаг дэвсгэрт үйл ажиллагаа явуулдаг “Очир” төвийн зочид буудлын өрөөнд 13 настай охин амиа алдсан харамсалтай хэрэг гарсанаас хойш бүтэн жилийг ардаа үджээ. Хууль шүүхийн байгууллагаас хуулийн дагуу шудрага явуулахыг хохирогчийн ар гэр болон иргэний нийгмийн байгууллага, иргэд удаа дараа шаардсаар ирсэн.

"Очир" төвд амиа алдсан 13 настай охины хэргийн шүүх хурал хэд хэдэн удаа тодорхой шалтгаанаар хойшлогдож байсан ч 2018 оны 11 дүгээр сарын 23-ны өдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өглөөний 10:00 цагт эхэлсэн. Долоон цаг орчим үргэлжилсэн шүүх хурал завсарлаж, шүүгчид шийдвэрээ танилцуулав. Шүүх бүрэлдэхүүн шүүгдэгч Д.Жавхлан, М.Амарболд нарт хоёуланд нь бүх насаар нь хорих ял оноосон гэдгийг хохирогчийн өмгөөлөгч Р.Булгамаа, Г.Батбаяр нар хэллээ.

Шинэчлэгдсэн эрүүгийн хуулийн 10.1 дүгээр зүйл Хүнийг алах, 11.6 дугаар зүйл Хүний эрүүл мэндэд хөнгөн хохирол учруулах, 12.1 дүгээр зүйл Хүчиндэх гэсэн зүйл залтуудыг хүндрүүлэх нөхцөл байдалтайгаар үйлдсэн нь хуулиар тогтоогдлоо.

Хэргийн шийдвэрийг иргэний нийгмийн байгууллага болон иргэд олон нийт чих тавин хүлээж байсан. Хууль сахиулах байгууллага тус хэргийг шударгаар шийдвэрлэсэн ч тус хэргийн үйл явц яагаад удааширсан, хохирогчийн эрхийг хамгаалахад хуулийн байгууллага яагаад ийм болхи байсныг бид эргүүлэн асуух хэрэгтэй. Бид цаашид хүчирхийллийн бүхий л хэргүүдийг сенсаци төдийхөн болгоод өнгөрөх бус тууштай тэмцэж, бодитоор оролцож хүний эрхийн ноцтой зөрчлүүдийг таслан зогсооход дуу хоолойгоо үргэлж хүргэж байх хэрэгтэй гэдгийг ахин уриалж байна.

Лантуун дохио ТББ- Эрчүүдийн клуб

2018.11.23