Таны хүүхэд хайрын өлсгөлөнд орсон юм биш биз?

7 сар-н өмнө 671

advise image

Эцэг эхчүүдээ! Та хүүхэддээ хэр их цаг хугацааг зориулдаг вэ? Өглөө зэрэгцэж гарч ажил, цэцэрлэг/сургууль руугаа явцгааж орой нь ядарч байгаагаа гайхан хүүхэддээ тавих анхаарал халамжаа орхигдуулж байгаа юм биш биз? Таны бодлоор хайрын өлсгөлөн гэж байдаг уу?

Хүүхэд эцэг эхийн хооронд байх ёстой элэгсэг дулаан холбоо нь харилцах хэрэгцээ гэж чухалчилан яригдаад байгаа тэр зүйлийн гол шижим, амин сүнс нь гэж хэлж болно. Би хэр зэрэг үнэ хүндтэй хүн бэ? Намайг хүсч хүлээсэн үү? Эсвэл би эцэг эхдээ гай зовлон болж байна уу? гэж нялх хүүхэд танаас асууж чадахгүй. Гэвч та үрийнхээ нүдийг хараарай. Тэр нүд танд их олон зүйлийг хэлж өгөх болно. Уйтгар нэвт шингэсэн харцтай бяцхан хүүхэд хэнийх вэ? гэж та өөрөөсөө асуугаарай. Та дахиад л хүүхдээ хар, ажигла. Ноомой хүлцэнгүй, сул биетэй, цонхийсон царайтай бяцхан жаал танаас энэрэл хүсэх мэт өмнө чинь сууна уу? "Бусдаас дутуугүй л хооллож ундлаад байхад яасан хачин юм бэ?" гэж та гайхаж магадгүй. Гэтэл та түүнийг хайраар дутаасан эсэхээ эргэцүүлээрэй.

Хүүхдийг байнга ад шоо үзэх, харааж загнах, зодож занчих, байнга завгүй байх зэрэг олон хүчин зүйл хайрын өлсгөлөнд ороход нь нөлөөлдөг. Хайрын өлсгөлөнд орсон хүүхдүүд "Намайг хайрлаж халамжлах, энхрийлэн тэврэх хүн байна уу" гэж байнга орчныхоо хүмүүсээс хүсэн хүлээж байдаг. Эцгийнхээ ханхар цээжинд наалдан, эхийнхээ зөөлхөн энгэрт тэврүүлэх хүсэл хүүхэд бүрт байдаг.

Ямар хүүхэд таньдаг, таньдаггүй хүн рүү гүйж очоод наалдаад байдаг вэ? Та ажиглаарай. Эцэг эх нь төдийлөн ойшоодоггүй, эсвэл байнга орхиж явдаг хүүхдүүд хүн хүн рүү гүйж очоод эрхлэх гэж горьдон хардаг. Ийм хүүхэд хожим нь хүмүүсийг хүний, өөрийн гэж ялгах чадвар муутай, хүний үгэнд оромтгой, бусдын нөлөөнд амархан автдаг хүн болон өсдөг гэж зарим эрдэмтэд үзсэн байдгийг үгүйсгэх аргагүй юм.

Тэгвэл таны хүүхэд хайрын өлсгөлөнд орсон юм биш биз?? Бяцхан үрсэд тань амттан, гоё машин, хөөрхөн хүүхэлдэй, таны утсан дээрх кэнди крашнаас илүү ээж аавын халуун дулаан үг, анхаарал халамж, хамтдаа өнгөрүүлэх цаг хугацаа хамгаас үнэтэй.

Лантуу хүүгийн найзаас танд хүүхэдтэйгээ хийж болох бяцхан сонирхолтой санаа өгөе :)

  • Өдөр бүр хүүхдээсээ өнөөдөр юу сурч авсан, сургууль/цэцэрлэг дээр нь юу болсон мөн өнөөдрийг хэрхэн өнгөрүүлсэн талаар нь асууж ярилцаарай. Энэ нь таны хүүхдэд өөрийгөө илэрхийлэх, зөв бурууг ялгах чадвар гэх мэт олон эерэг үр нөлөөтэй бөгөөд хамгийн чухал нь тантай элэгсэг дотно харилцаж хайр халамжаар дутахгүй өсч торних юм.

  • Амралтын өдрийг агаарт гарах өдөр болго. Хамтдаа цэвэр агаарт гарч ууланд алх, хөгжилтэй гэр бүлийн тоглоом тогло. Энэ нь таны болон хүүхдийн тань эрүүл мэндэд тустай, мөн таны хүүхдэд амьдралынх нь аз жаргалтай нэгэн дурсамж болж үлдэх юм.

  • Шинэ үзвэр үзэж хамтдаа ширээ тойрч суугаад оройн зоог барь. Хооллох үедээ ямар нэг хөгжилтэй зүйлсийн талаар ярилц. Таны хүүхдэд аав ээждээ хэлэх олон хөгжилтэй зүйл байгаа гэдэгт итгэлтэй байна.

  • Гэртээ хүүхдүүдтэйгээ бяцхан тэмцээн зохиогоорой. Ялагчын шагналыг мартаж болохгүй шүү. Шагнал зөвхөн эд материал байдаггүй гэдгийг санаарай.

  • Хүүхдүүддээ үлгэр уншиж өгөөрэй. Таны хүүхдэд сэтгэн бодох, хүнийг сонсох чадвар зэрэг олон чадвар төлөвших болно.

Та дээрх зөвлөгөөнүүдийг туршиж үзэхээс гадна хүүхэдтэйгээ ярилцаад хамтдаа шинэ содон зүйлс сэдээрэй. Танд амжилт хүсье!

Лантуу хүүгийн найз