Ид шидийн орондоо анх удаа эх үрсийн баяраа тэмдэглэлээ.

3 сар, 2 долоо хоног-н өмнө 543

advise image

Олон улсын хүүхлийн эрхийг хамгаалах өдрийг угтан "Ид шидийн орон" хүүхэд хамгаалал, хөгжлийн төв дээр хамгийн анхны Эх Үрсийн баяраа тэмдэглэн өнгөрүүллээ. 5 сарын сүүлийн хоёр 7 хоног сайн дурын залуучууд гарын доорх материал ашиглан ид шидийн орноо тохижуулан, хүүхдүүдэд өгөх бэлэгнүүд цуглуулж бүүр өөрсдөө дуу, бүжиг дэглэн Эх үрсийн баяртаа шаргуу бэлдсэн билээ. Хүсэн хүлээсэн өдөр ч ирлээ. Дотроо жаахан айдастай ч дүүрэн догдлолтой баярын өдөр. Хэр олон хүүхэд ирэх бол, цаг агаар хүйтэн бидний бэлтгэсэн зүйлсийг норгочих болов уу? гэсэн түгшүүртэй сэтгэл харин ч эсрэгээрээ боллоо.

Олон ч хүүхдүүд ирж дуутай шуутай, инээд хөөрөөр дүүрэн ид шидийн орон болоод хувирчихлаа. Бидний ид шидийн орны баяр дээр Шүүдэрхэн болон Нисдэг хүү хоёр Лантуу хүүгийн хамт олон ч хүүхдийг баярлуулсан даа. Энэ дүр төрхийг олж харсан олон хүмүүс сэтгэлийн жаргал авсан гэдэгт итгэлтэй байна. Хэдхэн сарын өмнө хоосон хашаа байсан энэ газарт ингээд хүүхдүүд инээлдээд, олон хүмүүс бужигналдаад, бүтээн байгуулалт хийгдэнэ гэж хэн ч зүүдлээгүй байх. Харин бид зүүдлүүлэх биш бүүр бодит зүйл болгоод эхлүүлчихлээ...

Цаг агаар ч сайхан байлаа. Жаахан сэрүүхэн байсан ч хүүхэд бүхний инээд биднийг дулаацуулсан юм. Дараа жил бид маш гайхалтай баярыг яг энэ талбайдаа хийх болно. Ид шидийн орон минь баригдаад дуусчихсан үйл ажиллагаагаа хийгээд эхэлчихсан байна гээд төсөөл дөө. Би лав догдлож байна. Харин та...

Мэдээж энэ өдөр сайхан өдөр болсон. Ид шидийн орноос илүү гарсан цөөхөн хэдэн бэлгийг Биогийн хогийн цэг болон Улаан чулуутын хогийн цэг рүү авч явсан юм. Энэ өдөр арай ч хүүхдүүд хогин дээр байхгүй байх гэсэн бодолтой байсан ч эсрэгээрээ маш олон хүүхдүүд тэнд байв. Илүү гарсан цөөн хэдэн бэлгээ тарааж байсан залуусын инээд хөөр, аз жаргалаар дүүрэн байсан сэтгэл өөрийн эрхгүй хөнгөн гунигт автсан юм. Аргаггүй биз дээ. Хүүхэд бүр баярлах ёстой энэ л өдөр тэд хогин дээр... Гэхдээ бид тэр бяцхан хүүхдүүдэд жаахан ч гэсэн гэрэл нэмсэн гэдэгт итгэлтэй байна. Цаашид бид илүү их зүйлийг хийх болно.

БИД ХҮҮХДЭД ХАЙРТАЙ...

Бидэнд сэтгэл гарган тусалсан, бэлэг хандивласан хүн бүхэндээ баярлалаа.

Хүндэтгэсэн: ЛАНТУУН ДОХИО ТББ