Дэлхийн Монголчууд хамтдаа ид шидийг бүтээж байна.

4 сар-н өмнө 586

advise image

Хүчирхийлэлгүй, хүүхдэд ээлтэй нийгмийг бүтээхэд Лантуун дохио ТББ-ын хамт олон дэлхийн Монголчууд хамтран Ид шидийн орон төслийг амжилттай хэрэгжүүлээд 2 жилийг ардаа үджээ. Энэ хугацаанд хүүхэд хамгаллын үйлчилгээг бие даан явуулж, хөгжлийн төвийн цогц үйлчилгээг явуулж хүүхэд хамгаалал, хүүхдийн боловсролд өөрсдийн чадах хувь нэмрээ оруулсаар. Ид шидийн орон төсөл хүрээгээ тэлж дараагийн төвийн бүтээн байгуулалтыг өнгөрсөн 4 сараас эхлүүлсэн билээ. Одоогоор барилгын бүтээцийн ажил 40 гаруй хувьтай явж байна. Хандив тусламж тасрахгүй байгаа ч бидэнд төсөв шаардлагатай хэвээр.

Лантуун дохио ТББ-ын залуус, Америкийн салбар, Швейцарын салбар гээд дор бүрнээ хандив босгох бүхий л боломжуудыг ашиглаж байна. Өнгөрсөн наадмын өдрүүдээр дэлхийн Монголчууд өөрсдийн амьдардаг хотуудад хандив босгох үйл ажиллагаануудыг зохион байгууллаа. Лантуун дохио ТББ-ын албан ёсны салбар байрлаж буй АНУ-ын Вашингтон ДиСи болон Сан Франциско, Сакраменто, Бэй Аэриа хотын Монголчууд, Япон улс дахь Монголчууд гээд дэлхийн өнцөг буланд Ид шидийг хамтдаа бүтээхээр сэтгэл зориулан ажиллаж байна.

Бэй Аэриа хотын баяр наадмын үеэр "Ид Шидийн Орон-2" төвийн бүтээн байгуулалтын ажлыг танилцуулж, хандив босгох үйл ажиллагааг зохион байгуулсан Д.Долгорсүрэн тэргүүтэй Сан Франциско дахь Лантуугийн идэвхтэн гишүүд халуун наранд өдөржин хуушуур хайрч, бүтээгдэхүүн борлуулж, наадамд ирсэн олон хүмүүст Ид шидийн орон-2 төвийн талаар дэлгэрэнгүй мэдээлэл түгээн нийт 2000 долларын хандив босгож чаджээ.

Хандивын үйл ажиллагааг зохион байгуулахад оролцсон нийт багийн гишүүд, сайн дурынхандаа чин сэтгэлээсээ баярлалаа.

Нийгэмд гэрэл гэгээ түгээхийг зорин, ажил амьдрал, сэтгэл зүтгэлээ зориулан ажилласан та бүхэн жинхэнэ ид шидийг бүтээгчид юм.

Лантуун дохио ТББ

Хүүхэд бүхэн инээнэ, Ид шидийг бүтээнэ